Keflavík - Fylkir á fimmtudag kl. 19:15

Fimmtudaginn 20. maí leika Keflavík og Fylkir í 3. umferð Pepsi-deildarinnar.  Leikurinn fer fram á Njarðtaksvellinum í Njarðvík og hefst kl. 19:15.  Þarna er um sannkallaðan toppslag að ræða en Keflavík og Fylkir eru einu liðin sem hafa unnið tvo fyrstu leiki sína í deildinni.  Dómari leiksins verður stuðboltinn Erlendur Eiríksson, aðstoðardómarar þeir Áskell Þór Gíslason og Sverrir Gunnar Pálmason en eftirlitsmaður KSÍ er Ingi Jónsson.

Keflavík og Fylkir hafa leikið 24 leiki í efstu deild, þann fyrsta árið 1989.  Það er nokkuð jafnt á komið með liðunum í innbyrðis leikjum þeirra; Keflavík hefur unnið 9 leikjanna, átta sinnum hefur orðið jafntefli en Fylkir hefur unnið 7 leiki.  Markatalan er 29-34 fyrir Fylki.  Stærsti sigur Fylkis er 4-0 árin 2007 og 2000 en Keflavík hefur mest náð að sigra Fylki með 2ja marka mun.  Sex leikmenn sem nú eru í leikmannahópi Keflavíkur hafa skorað gegn Fylkismönnum í efstu deild.  Guðmundur Steinarsson hefur skorað sex mörk, Hólmar Örn Rúnarsson hefur gert þrjú, Haukur Ingi Guðnason og Hörður Sveinsson hafa skorað tvö mörk og þeir Guðjón Antoníusson og Haraldur Freyr Guðmundsson hafa gert eitt mark hvor.

Liðin mættust 8 sinnum í næstefstu deild á árunum 1981-1992.  Keflavík vann 6 leiki, einum lauk með jafntefli og Fylkir vann einn leik.  Markatalan í B-deildinni er 15-6 fyrir Keflavík.

Liðin hafa mæst þrisvar sinnum í bikarkeppni KSÍ, árin 1989, 1995 og 2004.  Keflavík hefur unnið alla þrjá leikina og markatalan er 5-1. 

Liðin mættust að sjálfsögðu tvisvar í Pepsi-deildinni síðasta sumar.  Fylkismenn unnu sinn heimaleik 2-0 og skoraði Valur Fannar Gíslason bæði mörkin úr vítaspyrnum.  Keflavík vann síðan sinn heimaleik þar sem Hólmar Örn Rúnarsson skoraði eina mark leiksins.

Það hefur ekki verið mikill samgangur milli félaganna tveggja í gegnum árin.  Þórir Sigfússon þjálfaði reyndar bæði liðin á sínum tíma.  Þó má ekki gleyma að Haukur Ingi Guðnason lék með Fylki og núverandi aðstoðarþjálfari liðsins er Keflvíkingurinn Kristinn Guðbrandsson.

Það er skemmst frá því að segja að Fylkir hefur aldrei náð að sigra í Keflavík í efstu deild.  Liðin hafa leikið 12 sinnum í efstu deild á Keflavíkurvelli og hefur Keflavík unnið 8 leikjanna en fjögur jafntefli hafa litið dagsins ljós.

Úrslit í leikjum Keflavíkur og Fylkis í efstu deild í Keflavík hafa orðið þessi: