Keflavík - Grindavík á mánudag kl. 19:15

Grindavík og Keflavík leika í 13. umferð Pepsi-deildarinnar mánudaginn 30. júlí.  Leikurinn fer fram á Nettó-vellinum í Keflavík og hefst kl. 19:15.  Fyrir leikinn er Keflavík í 8.-9. sæti deildarinnar með 15 stig en Grindavík er neðsta sætinu með sex stig.  Það er því mikið í húfi og auðvitað er alltaf mikið fjör þegar þessi nágrannalið mætast.  Dómari leiksins verður Þorvaldur Árnason og aðstoðardómarar hans Áskell Þór Gíslason og Andri Vigfússon en Eyjólfur Ólafsson er eftirlitsmaður KSÍ. 

Keflavík og Grindavík hafa mæst 31 sinni í efstu deild, fyrst árið 1995.  Það er nokkuð jafnt á komið með liðunum í innbyrðis leikjum þeirra; Keflavík hefur unnið 14 leiki og Grindavík 10 en sjö sinnum hefur orðið jafntefli.  Markatalan er 48-38 fyrir Keflavík.  Stærsti sigur Grindavíkur var 4-0 sigur á Grindavíkurvelli árið 1996 en stærsti sigur Keflavíkur er 4-0 sigurinn í Grindavík fyrr í sumar.  Mesti markaleikur liðanna kom árið 2004 þegar Grindavík vann 4-3.  Sjö leikmenn í leikmannahópi Keflavíkur hafa skorað gegn Grindavík í efstu deild.  Guðmundur Steinarsson hefur skorað tíu mörk, Jóhann B. Guðmundsson fimm, Magnús Þorsteinsson þrjú, Frans Elvarsson tvö og Einar Orri Einarsson, Arnór Ingvi Traustason og Haraldur Freyr Guðmundsson eitt mark hver.

Liðin hafa aðeins einu sinni mæst í bikarkeppninni en það var árið 1991.  Keflavík vann þá á Keflavíkurvelli þegar Óli Þór Magnússon skoraði eina mark leiksins.

Keflavík og Grindavík léku 6 leiki í B-deildinni á árunum 1990-1992.  Keflavík vann fjóra leikjanna en Grindavík einn og jafntefli varð í einum leik.  Markatalan í leikjunum er 13-9 fyrir Keflavík.

Liðin hafa þegar leikið tvo leiki í sumar.  Sá fyrri var í Pepsi-deildinni og þá vann Keflavík öruggasn 4-0 sigur á Grindavíkurvelli.  Frans Elvarsson skoraði tvö mörk í þeim leik og Einar Orri Einarsson og Arnór Ingvi Traustason sitt hvort markið.  Liðin léku síðan í 32 liða úrslitum Borgunar-bikarsins.  Grindavík vann þann leik þar sem Alex Freyr Hilmarsson gerði eina mark leiksins.

Það hefur verið þó nokkur samgangur milli Keflavíkur og Grindavíkur í gegnum árin enda ekki langt að fara.  Milan Stefán Jankovic hefur þjálfað bæði lið og í gegnum árin hafa m.a. Andri Steinn Birgisson, Grétar Hjartarson, Paul McShane, Kristinn Jóhannsson, Hjálmar Hallgrímsson, Þorsteinn Bjarnason og Eysteinn Hauksson leikið með báðum félögunum. Okkar ágæti þjálfari, Zoran Daníel Ljubicic, var einnig leikmaður beggja þessara liða á sínum ferli.  Í ár er einn leikmaður í hvoru liði sem hefur leikið með þeim báðum en það er Magnús Sverrir Þorsteinsson í okkar liði og Scott Ramsay í liði Grindavíkur.

Úrslit í leikjum Keflavíkur og Grindavíkur í Keflavík hafa orðið þessi undanfarin ár: