Keflavík - ÍA á sunnudag kl. 19:15

Keflavík og ÍA mætast í 15. umferð Pepsi-deildarinnar á sunnudag.  Leikurinn hefst kl. 19:15 á Nettó-vellinum í Keflavík.  Það má svo sannarlega reikna með hörkuleik enda eru liðin jöfn í deildinni í 6.-7. sæti með 21 stig.  Dómari leiksins verður Garðar Örn Hinriksson, aðstoðardómarar hans verða Einar Sigurðsson og Sverrir Gunnar Pálmason og Þórður Georg Lárusson er eftirlitsmaður KSÍ.
 
Keflavík og ÍA hafa mæst 86 sinnum í efstu deild og hafa Skagamenn talsverða yfirburði í viðureignum liðanna.  Liðin mættust fyrst árið 1958 þegar við lékum fyrst í efstu deild.  Akranes vann þann leik 5-1 en Högni Gunnlaugsson skoraði mark Keflavíkur.  Alls hefur ÍA sigrað í 47 leikjum, 12 sinnum hefur orðið jafntefli en Keflavík hefur unnið 27 leiki.  Markatalan er 106-179, Skagamönnum í vil.  Stærstu sigrar Keflavíkur í leikjum liðanna eru 4-1 sigrar 1973 og 2008 en stærsta tapið var 0-9 tap árið 1959 en það er stærsta tap Keflavíkur í efstu deild.  Þrír leikmenn í leikmannahópi Keflavíkur hafa skorað gegn ÍA í efstu deild; Guðmundur Steinarsson hefur skorað fimm mörk og Arnór Ingvi Traustason og Magnús Þorsteinsson eitt hvor.

Liðin mættust tvisvar í næstefstu deild en það var árið 1991.  Skagamenn unnu báða leikina og markatalan var 1-6.

Keflavík og ÍA hafa leikið 13 leiki í bikarkeppninni, fyrst árið 1960 og síðast árið 2006.  Keflavík hefur unnið 5 leikjanna en ÍA 7 en einum lauk með jafntefli.  Markatalan er 16-19 fyrir ÍA.  Guðmundur Steinarsson hefur skorað tvö bikarmörk gegn Skaganum en þau mörk komu í mögnuðum bikarleik liðanna árið 2006.

Liðin léku í deildinni fyrr í sumar og þá á heimavelli Skagamanna.  ÍA vann þann leik 3-2 þar sem Guðmundur Steinarsson og Arnór Ingvi Traustason skoruðu fyrir Keflavík en Gary Martin, Ólafur Valur Valdimarsson og Garðar Gunnlaugsson gerðu mörk heimamanna.

Í gegnum árin hafa nokkir leikmenn leikið með báðum þessum liðum og má þar nefna Kristján Jóhannsson og markverðina Ólaf Gottskálksson, Bjarna Sigurðsson og Bjarka Freyr Guðmundsson.

Úrslit í leikjum Keflavíkur og ÍA á heimavelli okkar hafa orðið þessi í efstu deild undanfarin ár: