Keflavík - Stjarnan á mánudag kl. 19:15

Mánudaginn 14. maí er komið að fyrsta heimaleik okkar í Pepsi-deildinni í ár þegar Stjörnumenn koma í heimsókn.  Leikurinn fer fram á Nettó-vellinum og flautað verður til leiks kl. 19:15.  Okkar menn eru með jafntefli og sigur eftir tvær umferðir en Stjarnan er búin að gera tvö jafntefli.  Dómari leiksins verður Kristinn Jakobsson, aðstoðardómarar Einar Sigurðsson og Halldór Breiðfjörð Jóhannsson og eftirlitsmaður KSÍ verður Eyjólfur Ólafsson.  

Keflavík og Stjarnan hafa leikið 14 leiki í efstu deild, þann fyrsta árið 1994.  Keflavík hefur unnið sex leiki en Stjarnan þrjá og fimm sinnum hefur orðið jafntefli.  Markatalan er 23-19 fyrir Keflavík.  Jóhann Birnir Guðmundsson hefur skorað fjögur mörk gegn Stjörnunni í efstu deild, Guðmundur Steinarsson og Hilmar Geir Eiðsson þrjú og Einar Orri Einarsson eitt mark.

Liðin léku fjóra leiki í B-deildinni, árin 1992 og 2003.  Keflavík vann tvo þessara leikja og Stjarnan einn en einum leik lauk með jafntefli.  Markatalan er 8-6 fyrir Keflavík.  Einn núverandi leikmaður Keflavíkur hefur skorað í leikjum liðanna í næstefstu deild en það er Magnús Þorsteinsson.

Keflavík og Stjarnan hafa einu sinni mæst í bikarkeppni KSÍ en það var árið 2008.  Þá vann Keflavík 2-1 á heimavelli í 32 liða úrslitum keppninnar.  Magnús Þorsteinsson skoraði fyrir Keflavík í þeim leik.

Síðasta sumar mættust liðin tvisvar í Pepsi-deildinni og voru báðir leikirnir miklir markaleikir.  Fyrri leikurinn var í fyrstu umferð mótsins og fór fram í Keflavík.  Okkar menn unnu 4-2 þar sem Jóhann Birnir Guðmundsson skoraði tvö mörk en Hilmar Geir Eiðsson og Guðmundur Steinarsson skoruðu einnig.  Daníel Laxdal og Halldór Orri Björnsson gerðu mörk gestanna.  Keflavík vann einnig seinni leikinn í Garðabænum en hann fór 3-2.  Einar Orri Einarsson, Magnús Þórir Matthíasson og Hilmar Geir Eiðsson gerðu mörkin fyrir Keflavík en Baldvin Sturluson og Halldór Orri Björnsson skoruðu fyrir heimamenn.

Nokkrir leikmenn hafa leikið með bæði Keflavík og Stjörnunni í gegnum árin, m.a. Adolf Sveinsson, Kristinn Guðbrandsson, Helgi Björgvinsson og markmennirnir Bjarki Freyr Guðmundsson og Magnús Þormar.  Nú leikur Grétar Atli Grétarsson með okkar liði en hann er uppalinn Stjörnumaður.

Úrslit í leikjum Keflavíkur og Stjörnunnar í Keflavík hafa orðið þessi: