Keflavík - Þór á laugardag kl. 14:00

Laugardaginn 1. október leika Keflavík og Þór í 22. og síðustu umferð Pepsi-deildarinnar.  Leikurinn fer fram á Nettó-vellinum og hefst kl. 14:00.  Fyrir leikinn eru bæði lið í 8.-10. sæti deildarinnar með 21 stig og eru meðal fjögurra liða sem eru í fallbaráttu í síðustu umferðinni.  Keflavík dugir jafntefli til að halda sæti sínu í deildinni en tapist leikurinn þurfum við að treysta á hagstæð úrslit í öðrum leikjum.  Dómari leiksins verður Kristinn Jakobsson, aðstoðardómarar þeir Jóhann Gunnar Guðmundsson og Andri Vigfússon, varadómari er  Erlendur Eiríksson og Sigurður Hannesson er eftirlitsmaður KSÍ.  Leikurinn verður sýndur beint á Stöð 2 Sport.

Það skal tekið fram að ókeypis er á leikinn í boði fyrirtækja í Keflavík.

Keflavík og Þór hafa leikið 23 leiki í efstu deild, þann fyrsta árið 1977.  Keflavík hefur unnið átta leikjanna, níu sinnum hefur orðið jafntefli en Þór hefur unnið sex leiki.  Markatalan er 41-35 fyrir Keflavík.  Stærsti sigur Keflavík er 5-2 sigur árið 1993 og það er jafnframt mesti markaleikur liðanna í efstu deild.  Þórsarar hafa mest unnið Keflavík með tveggja marka mun.  Tveir leikmenn sem nú eru í leikmannahópi Keflavíkur hafa skorað gegn Þór í efstu deild, Hilmar Geir Eiðsson skoraði fyrr í sumar og Magnús Þorsteinsson skoraði gegn Þórsurum árið 2002.

Liðin mættust 4 sinnum í næstefstu deild árin 1991 og 2003.  Þór vann tvo leikjanna en hinum tveimur lauk með jafntefli.  Markatalan í B-deildinni er 6-9 fyrir Þór.

Liðin hafa mæst fjórum sinnum í bikarkeppni KSÍ, árin 1987, 1991, 1993 og 2009.  Þór vann tvo fyrstu leikina eftir vítaspyrnukeppni en Keflavík vann tvo þá síðari.  Markatalan er 6-4 fyrir Keflavík. 

Það hefur ekki verið mikill samgangur milli félaganna tveggja í gegnum árin.  Kristján Guðmundsson þjálfaði reyndar bæði liðin á sínum tíma og Pétur Heiðar Kristjánsson er nú í herbúðum Þórs en hann lék með Keflavík árið 2007.  Áður höfðu Óli Þór Magnússon og Ólafur Pétursson leikið með báðum þessum félögum.

Úrslit í leikjum Keflavíkur og Þórs í efstu deild á heimavelli okkar hafa orðið þessi: