Keflavík - Þór á sunnudag kl. 16:00

Sunnudaginn 4. maí leika Keflavík og Þór í 1. umferð Pepsi-deildarinnar.  Leikurinn fer fram á Nettó-vellinum og hefst kl. 16:00.  Dómari leiksins verður Guðmundur Ársæll Guðmundsson, aðstoðardómarar þeir Smári Stefánsson og Haukur Erlingsson og Eyjólfur Ólafsson er eftirlitsmaður KSÍ.

Keflavík og Þór hafa leikið 26 leiki í efstu deild, þann fyrsta árið 1977.  Keflavík hefur unnið níu leikjanna, tíu sinnum hefur orðið jafntefli en Þór hefur unnið sjö leiki.  Markatalan er 46-41 fyrir Keflavík.  Stærsti sigur Keflavík er 5-2 sigur árið 1993 og það er jafnframt mesti markaleikur liðanna í efstu deild.  Þórsarar hafa mest unnið Keflavík með tveggja marka mun.  Fjórir leikmenn sem nú eru í leikmannahópi Keflavíkur hafa skorað gegn Þór í efstu deild, Jóhann Birnir Guðmundsson og Magnús Þorsteinsson hafa skorað tvö mörk og Bojan Stefán Ljubicic og Hörður Sveinsson eitt hvor.  Það er hins vegar Óli Þór Magnússon sem hefur skorað flest mörk fyrir Keflavík gegn Þór í efstu deild eða sjö en næstur er Sigurður Björgvinsson með fjögur mörk.

Liðin mættust 4 sinnum í næstefstu deild árin 1991 og 2003.  Þór vann tvo leikjanna en hinum tveimur lauk með jafntefli.  Markatalan í B-deildinni er 6-9 fyrir Þór.

Liðin hafa mæst fjórum sinnum í bikarkeppni KSÍ, árin 1987, 1991, 1993 og 2009.  Þór vann tvo fyrstu leikina eftir vítaspyrnukeppni en Keflavík vann tvo þá síðari.  Markatalan er 6-4 fyrir Keflavík. 

Liðin léku tvisvar í Pepsi-deildinni í fyrra eins og lög gera ráð fyrir.  Þór vann fyrri leikinn á heimavelli okkar en þar urðu lokatölur 1-3.  Arnór Ingvi Traustason skoraði fyrir okkar lið en Chukwudi Chijindu, Jóhann Helgi Hannesson og Sveinn Elías Jónsson gerðu mörk gestanna.  Seinni leiknum á Akureyri lauk með 2-2 jafntefli.  Þar skoruðu Bojan Stefán Ljubicic og Jóhann Birnir Guðmundsson fyrir Keflavík en Chukwudi Chijindu og Mark Tubæk fyrir Þór.  Ómar Jóhannsson varði vítaspyrnu frá Chijindu í leiknum.

Það hefur ekki verið mikill samgangur milli félaganna tveggja í gegnum árin.  Þó má ekki gleyma því að Kristján Guðmundsson þjálfaði Þór á sínum tíma og Pétur Heiðar Kristjánsson, Óli Þór Magnússon og Ólafur Pétursson hafa leikið með báðum þessum félögum.

Úrslit í leikjum Keflavíkur og Þórs í efstu deild á heimavelli okkar hafa orðið þessi:

Frásögn Morgunblaðsins um fyrsta leik Keflavíkur og Þórs í efstu deild.
Leikurinn fór fram 7. maí 1977 á malarvellinum í Keflavík.