Keflavík - Víkingur á sunnudag kl. 19:15
Þá er komið loksins að fyrsta leik tímabilsins hjá knattspyrnufólki í Keflavík þegar Víkingar koma í heimsókn í fyrstu umferð Pepsi-deildarinnar. Leikurinn verður á Nettó-vellinum í Keflavík sunnudaginn 3. maí kl. 19:15. Það er alltaf stór stund þegar deildarkeppnin byrjar eftir langt og strangt undirbúningstímabil og við reiknum með fjölmenni á völlinn á þennan fyrsta heimaleik sumarsins.
Það verður grill í félagsheimilinu fyrir leik og um að gera og kíkja og spá í spilin. Þar opnar kl. 18:00.
Eins og fram hefur komið er Keflavík spáð 8. sæti í Pepsi-deildinni í öllum helstu spám sem hafa verið gerðar fyrir mótið en Víkingum er spáð 6.-7. sæti í sömu spám. Í fyrra endaði Keflavík í 8. sæti deildarinnar en Víkingar luku keppni í 4. sæti.
Dómararnir
Dómari leiksins verður Erlendur Eiríksson, aðstoðardómarar þeir Gunnar Sverrir Gunnarsson og Frosti Viðar Gunnarsson og eftirlitsmaður KSÍ er Einar K. Guðmundsson.
Efsta deild
Keflavík og Víkingur hafa leikið 44 leiki í efstu deild, þann fyrsta árið 1970. Keflavík hefur haft betur í viðureignum liðanna í gegnum árin og unnið 22 leiki. Víkingar hafa sigrað 15 sinnum en sjö sinnum hefur orðið jafntefli. Markatalan er 69-55, Keflavík í vil. Stærsti sigur Keflavíkur er 4-0 sigur árið 1979 en stærsti sigur Víkings var 3-0 sigur á Laugardalsvelli árið 1984.
Liðin hafa leikið 22 sinnum í Keflavík í efstu deildinni. Þar hefur Keflavík unnið 14 leiki, fimm hefur lokið með jafntefli en Víkingar hafa þrisvar sinnum farið með sigur héðan. Markatalan í heimaleikjum gegn Víkingum er 39-18 fyrir Keflavík.
Þess má geta að Keflavík hefur ekki tapað heimaleik gegn Víkingum í efstu deild síðan 1983 en síðan hafa liðin mæst 11 sinnum í Keflavík.
Fimm af leikmönnum okkar í dag hafa skorað gegn Víkingum í efstu deild en Hörður Sveinsson hefur gert tvö mörk og þeir Guðjón Árni Antoníusson, Jóhann Birnir Guðmundsson, Magnús Þorsteinsson og Hólmar Örn Rúnarsson hafa gert eitt mark hver.
Alls hafa 36 leikmenn skorað fyrir Keflavík gegn Víkingum í efstu deild. Þar er Ragnar Margeirsson efstur á blaði með níu mörk og næstur kemur Þórarinn Kristjánsson með sex talsins.
B-deild
Liðin léku saman í B-deildinni árið 2003 og gerðu þá jafntefli í báðum leikjunum, 1-1 og 0-0. Liðin léku einnig bæði í næstefstu deild á upphafsárum Keflavikur í Íslandsmótinu, árin 1957 og 1958. Liðin léku þá þrjá leiki sem Keflavík vann alla og markatalan var 9-2.
Bikarkeppnin
Liðin hafa leikið fjórum í bikarkeppninni, árin 1975, 1981, 2006 og 2014 Keflavík hefur unnið alla leikina og er með markatöluna 10-1. Síðast léku liðin undanúrslitum keppninnar fyrr í sumar og þá vann Keflavík í vítaspyrnukeppni eftir markalaust jafntefli.
Síðast
Liðin mættust að sjálfsögðu tvisvar í Pepsi-deildinni síðasta sumar og unnu þá hvort sinn heimaleik. Víkingar unnu 3-1 í Víkinni; Hörður Sveinsson gerði mark Keflavíkur í leiknum en Aron Elís Þrándarson gerði tvö mörk fyrir heimamenn og Agnar Darri Sverrisson eitt. Liðin léku svo á Nettó-vellinum í síðustu umferðinni og þá vann Keflavík 2-0 þar sem Elías Már Ómarsson og Hörður Sveinsson skoruðu.
Bæði lið
Það hefur verið lítill samgangur milli Keflavíkur og Víkings í gegnum árin. Þó hafa Magnús Þormar, Helgi Björgvinsson og Sigurgeir Kristjánsson leikið með báðum liðum. Nú er einn fyrrverandi leikmaður Víkings í okkar röðum en Páll Olgeir Þorsteinsson lék nokkra leiki með Víkingum í fyrra og árið þar áður, reyndar sem lánsmaður frá Breiðabliki.
Síðustu leikir
Úrslit í leikjum Keflavíkur og Víkings á heimavelli okkar hafa orðið þessi undanfarin ár:
| Dags. | Keppni | Áh. | Úrslit | Mörk Keflavíkur |
| 04.10.2014 | A-deild | 635 | 2-0 |
Elías Már Ómarsson 2. Hörður Sveinsson 35. |
| 30.07.2014 | Bikarkeppni | 930 | 0-0 (4-2v) | |
| Keflavík tryggði sér sæti í úrslitum bikarkeppninnar | ||||
| 11.07.2011 | A-deild | 710 | 2-1 |
Guðjón Árni Antoníusson 21. Jóhann B. Guðmundsson 33. |
| 16.09.2007 | A-deild | 640 | 0-0 | |
| 19.05.2006 | A-deild | 850 | 2-1 |
Hólmar Örn Rúnarsson 41. Stefán Örn Arnarson 90. |
| 07.06.2004 | A-deild | 810 | 1-0 | Þórarinn Kristjánsson 71. |
| 13.09.2003 | B-deild | - | 0-0 | |
| Leikur í síðustu umferðinni, bæði lið komust upp í efstu deild | ||||
| 22.07.1999 | A-deild | 457 | 3-2 |
Þórarinn Kristjánsson 27. Ragnar Steinarsson 35. Eysteinn Hauksson 65. |
| Mark Eysteins kom beint úr hornspyrnu | ||||
| 25.09.1993 | A-deild | 202 | 3-2 |
Jóhann B. Magnússon 57. Gunnar Oddson 59. Kjartan Einarsson 83. |
| 02.09.1989 | A-deild | 248 | 3-2 |
Freyr Sverrisson 41. Freyr Sverrisson 59. Óli Þór Magnússon 90. |
