Keflavík Íslandsmeistarar í 7 manna bolta 2. flokks kvenna

Síðasta turnering í Íslandsmóti 2. flokks kvenna í 7 manna liðum fór fram hér í Keflavík í dag, sunnudaginn 22. ágúst.  Allir leikirnir voru leiknir að Iðavöllum 7.

Vindurinn spilaði stórt hlutverk þegar stelpurnar fengu Tindastól/Neista og Fylki í heimsókn.  Fyrst léku Keflavík og Fylkir og tapaðist sá leikur 0-1.  Fylkir sigraði síðan Tindastól/Neista 3-1.  Síðasti leikurinn var Keflavík - Tindastóll/Neisti og sigruðu stelpurnar okkar hann örugglega 3-0.  Sigurrós Guðmundsdóttir skoraði tvö markanna og Guðbjörg Þorvaldsdóttir það þriðja.  Stelpurnar voru auðvitað alveg gríðarlega ánægðar í leikslok og alveg rígmontnar og höfðu alveg efni á því!  Sigurhringurinn var tekinn og síðan tóku stelpurnar við gullverðlaunum og veglegum bikar úr hendi Rúnars Arnarsonar, fulltrúa KSÍ og Þorsteins Magnússonar, formanns Knattspyrnudeildar Keflavíkur.  Fylkisstúlkur lentu í öðru sæti og hrepptu því silfrið.  Þess má geta að fyrir leikjahrinuna í dag höfðu stúlkurnar unnið alla sína leiki í mótinu.  Þær enduðu því á toppnum og töpuðu aðeins þessum eina leik í dag.

Stúlkurnar í 2. flokki hafa æft með meistaraflokknum frá því í vetur og er það að skila sér vel í sterku liði nú.  Til hamingju stelpur. þið eruð framtíðin.