KR - Keflavík á sunnudag kl. 19:15

Okkar menn heimsækja KR-inga í 13. umferð Pepsi-deildarinnar sunnudaginn 28. júlí.  Leikur liðanna fer fram á KR-vellinum og hefst kl. 19:15.  Fyrir leikinn er Keflavík í 10.-12. sæti deildarinnar með 7 stig en KR er í 3. sætinu með 25 stig.  Bæði lið eru því í hörkubaráttu á sitt hvorum enda deildarinnar og það verður væntanlega hart barist um stigin sem eru í boði.  Dómari leiksins verður Örvar Sær Gíslason, aðstoðardómarar Birkir Sigurðarson og Andri Vigfússon og eftirlitsmaður KSÍ verður Jón Þór Ágústsson. 

Keflavík og KR hafa leikið 94 leiki í efstu deild, þann fyrsta árið 1958.  Jafnræði hefur verið með liðunum í gegnum árin, Keflavík hefur sigrað í 32 leikjum en KR 33 leiki en 29 leikjanna hefur lokið með jafntefli.  Markatalan er 128-145, KR í vil.  Stærsti sigur Keflavíkur í innbyrðis leikjum liðanna var 5-1 sigur á Keflavíkurvelli árið 1974.  Stærsti sigur KR-inga er hins vegar 8-1 árið 1960 og það er jafnframt mesti markaleikur þessara liða.  Fimm leikmenn í leikmannahópi Keflavíkur hafa skorað gegn KR í efstu deild; Hörður Sveinsson hefur skorað þrjú mörk, Jóhann B. Guðmundsson tvö og þeir Frans Elvarsson, Magnús Þórir Matthíasson og Magnús Þorsteinsson eitt mark hver.

Liðin hafa mæst 12 sinnum í bikarkeppni KSÍ, fyrst árið 1963 og síðast árið 2010.  Keflavík hefur unnið 5 bikarleiki en KR 7.  Markatalan í bikarnum er 20-26 fyrir KR.  Magnús Þórir Matthíasson hefur skorað eitt bikarmark gegn KR.

Liðin  mættust fyrr í sumar í Pepsi-deildinni og þá á Nettó-vellinum.  KR vann þann leik 2-0 þar sem Baldur Sigurðsson gerði bæði mörkin.

Þó nokkrir leikmenn hafa leikið með bæði Keflavík og KR í gegnum árin og ekki síður hafa félögin deilt sömu þjálfurunum.  Guðni Kjartansson, Hólmbert Friðjónsson, Ian Ross, Pétur Pétursson og Willum Þór Þórsson hafa allir þjálfað bæði liðin.  Upp úr 1990 var hálfgerð Keflavíkurnýlenda í Vesturbænum þegar Ólafur Gottskálksson, Sigurður Björgvinsson, Gunnar Oddsson og Ragnar Margeirsson léku þar allir undir stjórn Guðna.  Seinni árin hafa Haukur Ingi Guðnason, Stefán Gíslason og markmennirnir Bjarki Freyr Guðmundsson og Gunnleifur Gunnleifsson skipt milli þessara liða.  Tveir fyrrverandi leikmenn okkar, Baldur Sigurðsson og Jónas Guðni Sævarsson, leika nú með KR.

Úrslit í leikjum KR og Keflavíkur á heimavelli KR-inga hafa orðið þessi undanfarin ár: